Siglir tar il cuntegn

Chantun Rinforzar collavuraziun tranter chantun ed armada

Cun in model directiv vul il chantun Grischun rinforzar la collavuraziun tranter las autoritads chantunalas e communalas e l'armada svizra. Uschia vul ins er mussar a la populaziun la plivalur d'ina stretga relaziun cun l'armada.

Legende: Video Mussavia duai rinforzar collavuraziun tranter chantun ed armada abspielen. Laufzeit 1:57 Minuten.
Or da Telesguard dals 23.04.2018.

Il chantun Grischun lavura fitg stretg ensemen cun l'armada – quai è nagut nov. Nov è dentant che quai stat scrit sin palpiri en in model directiv (Leitbild). En quai model directiv ha il chantun fixà cura e pertge l'armada duai vegnir en acziun. Gia uss è l'armada fitg savens en acziun en il Grischun. Per exempel tar catastrofas da natira sco l'onn passa a Bondo cun las bovas u en Mesolcina e Val Calanca pervi dals incendis. Sper quai fan radund 5'000 commembers da l'armada lur servetsch al WEF a Tavau. Vitiers vegnan nundumbraivels dis ad occurenzas da sport grondas, sco per exempel il campiunadi mundial a da skis a San Murezzan.

Cun il model directiv vul il chantun uss rinforzar quella collavuraziun. Sa midar na vegnia dentant betg bler vid la collavuraziun. Per l'armada saja il model directiv dentant ina buna chaussa, uschia sappia ella tge ch'il chantun spetga il proxim temp da l'armada. Uschia Lucas Caduff, il cumandant da la divisiun territoriala trais, tar la quala er il Grischun tutga.

RR actualitad 17:00