En l’Engiadina Bassa quintan ins dentant tut en tut cun in enviern pli schlet che l’onn passà, quai era sa basond sin la prognosa dal KOF, il post da perscrutaziun da conjunctura da l’ETH.
En l’Engiadin’Ota ha la clientella da tschep tenor l’organisaziun turistica cudeschà. Ins percorschia dentant, ch’ils ulteriurs giasts sa decidan pli e pli a curta vista.
A Savognin èn las reservaziuns in zic pli bassas che l’onn passà. A Tavau n’han ins anc nagina survista.
Tar Surselva Turissem, cun las destinaziuns d’enviern da Sursaissa, Lumnezia e Breil, han ins fin ussa in plus da 9%. Quai cumpiglia dentant mo las reservaziuns d’abitaziuns e hotels ch’èn vegnidas cudeschads sur la plattafurma da l’organisaziun. Las cudeschaziuns dal nov resort Pradas sper la staziun a val a Breil, ch’avra las portas ils 26 da december, n’èn betg resguardadas.
En la regiun Flem/Laax/Falera vesi ora bain fin uss. Per exempel il Rocks Resort a la staziun a val a Laax è gia plain durant ils dis da festa.