Siglir tar il cuntegn

Chantun Requirents d’asil: GR è preparà

Il chantun Grischun vegn a lavurar uschè ditg che pussaivel cun las structuras chantunalas. Quai ha ditg il cusseglier guvernativ Christian Rathgeb oz durant l’ura da dumondas dal Cussegl grond.

Cusseglier guvernativ Rathgeb al microfon.
Legenda: Vul sustegnair las vischnancas uschè bain sco pussaivel - il cusseglier guvernativ Christian Rathgeb davart il chantun Grischun ed ils requirents d'asil. Keystone

Christian Rathgeb ha communitgà vinavant, ch’i dettia er ina planisaziun d’urgenza per il cas, ch’in grond dumber da persunas vegnia tuttenina en Svizra. La finamira clera dal chantun è, da lavurar uschè ditg sco pussaivel cun las structuras chantunalas. Las vischnancas n’hajan betg anc da spetgar che requirents d’asil vegnan directamain repartids sin las vischnancas.

Ed er sch’i vegnia propi uschè lunsch che las vischnancas èn responsablas, vegniss il chantun a sustegnair las vischnancas uschè bain sco pussaivel.

Armada svizra sustegnair ils chantuns

Il Cussegl federal ha incumbensà il departament federal da defensiun da prender las mesiras necessarias per che l'armada svizra po sustegnair las autoritads chantunalas sch'i dat marcantamain dapli migrants che vegnan sur cunfin.

La regenza svizra na vesa il mument però nagin basegn d'agir. L'incumbensa garantescha che l'armada po vegnir activa aifer curt temp. Tenor il plan d'urgenza vegniss l'armada en acziun sche passa 30'000 persunas passan il cunfin aifer paucs dis.

RR novitads 10:00