Suenter ina decisiun giuridica federala dal november 2013 ha la cumissiun per l'electricitad ElCom stuì reglar ina segunda giada la valur da tut ils indrizs tecnics che furman la rait d'electricitad. Da quella disposiziun nova resulta ussa, ch’ils concerns d’energia svizzers survegnan anc ina segunda giada raps per ils indrizs tecnics ch’els han vendì l’onn 2013 a l’interpraisa Swissgrid.
La possessura actuala da la rait d’electricitad, la Swissgrid, sto perquai pajar suenter 415 milliuns francs als concerns d'energia svizzers. La gronda part da la petta survegn cun 160 milliuns francs l’Axpo. L'Alpiq po quintar cun bun 100 milliuns.
La Repower spetga ils radund 4,5 milliuns francs da la Swissgrid afier il prim quartal 2017. Tenor la communicaziun da la Repower na vegnan las tariffas da la Swissgrid per il transport d’energia betg a patir da questa decisiun.
RR novitads 20:00