Il cusseglier dals chantuns Martin Schmid è dapi il 2008 en il cussegl administrativ da la Repower. Dapi il 2013 è el dentant er commember dal cussegl administrativ da la UBS Clean Energy Infrastructure. Quai è ina da las duas interpresas che vul investir en la Repower. Durant las contractivas tranter las duas interpresas saja el dentant s'abstenì uschia Martin Schmid. Perquai n'haja quai er dà nagin conflict d'interess. Er en il futur vegnia el a s'abstenair sche quai pudess dar conflicts d'interess. El vul numnadamain restar en domidus cussegls administrativs.
Er chantun na vesa nagin problem
En quel da la Repower duai el restar il represchentant dal chantun Grischun. Er lez na vesa nagin problem tar quai che Martin Schmid è er en il cussegl administrativ, quai di Mario Cavigelli il cusseglier guvernativ responsabel. Uschè ditg che tut restia transparent saja tut en urden. Dal medem avis èn er Repower ed UBS Clean Energy Infrastructure. Sch'i saja necessari possia Martin Schmid s'abstenair. Plirs advocats da dretg d'interpresa conferman quai, i saja nagut extraordinari che persunas èn en plirs cussegls administrativs da firmas che investeschan u collavuran in cun l'auter.