L'antecessur da Renato Fasciati, Hans Amacker, era ì en pensiun anticipadamain la fin d'october per motivs da sanadad. Dapi lura ha la Viafier retica tschertgà in nov directur.
Il nov directur Fasciati e creschì si en l'Engiadina ed ha passentà ses onns da scola e giuventetgna a San Murezzan e Samedan. Suenter ha el studegià econonmia publica.
Experientschas en il sectur dal traffic public ha Fasciati fatg durant ils onns 2007 fin 2011 ta la SBB / SBB Cargo. Silsuenter è el daventà manader da fatschenta da la «Zentralbahn».
«Mia clamada da siemi»
Renato Fasciati è in vair fan da la Viafier retica. E perquai di el era: «Questa nova clamada è mia clamada da siemi.» Sco uffant e giuvenils haja el passentà uras ed uras en ils trens da la pitschna cotschna. Sco uffant haja el fatg blers viadis cun la famiglia cun la Viafier retica e pli tard era ì a scola cun il tren.
Betg emprim directur cun num Fasciati
Renato Fasciati n’è betg l’emprim «Fasciati» che daventa directur da la Viafier retica. Dal 1990-2004 era Silvio Fasciati directur. Els n’èn betg parents, enconuschan dentant bain in l’auter. Renato Fasciati è maridà e bab da quatter uffants.
RR novitads 11:00