Il Cussegl federal vuless gugent intensivar las relaziuns da commerzi cun ils Stadis Unids. Sch'i dat dentant il proxim temp ina cunvegna da commerzi tranter ils dus pajais è uss anc intschert. I dat differentas opiniuns davart temas sensibels.
Sco Simonetta Sommaruga ha declerà suenter il discurs cun il president american, Donald Trump, dettia lura ina cunvegna da commerzi liber, cura che l'interess dad omaduas varts saja grond avunda. Per quai dovria dentant anc lavur da persvasiun. Ils discurs vegnian a cuntinuar.
Trump aveva signalisà da vulair ina cunvegna
«Jau avess gugent ina cunvegna da commerzi liber cun la Svizra.» Quai aveva ditg il president american, Donald Trump, avant il discurs cun la presidenta da la Confederaziun. Ins vesia lura, tge che saja pussaivel, aveva Trump ditg davant medias americanas e svizras.
Differenzas davart la midada dal clima
Tema da discurs tranter Donald Trump e Simonetta è però er stà la midada dal clima. Dasper grondas differenzas davart quest tema, dettia er puncts cuminaivels tranter ils dus pajais, ha ditg Sommaruga suenter il discurs. Trump vesia per exempel en la tecnologia gronds potenzials a favur da l'ambient.
En il discurs haja Sommaruga deplorà che l'USA saja sortida da la cunvegna dal clima da Paris. Trump haja però segirà ch'ils Stadis Unids na vegnian betg a far nagut per il clima. Finamiras concretas n'ha el dentant betg numnà.
Discurs en buna atmosfera
En general saja il discurs stà fitg avert e dad interess vicendaivel. Il discurs haja cuzzà pli ditg che planisà e quai saja per il pli ina buna novitad, ha ditg Simonetta Sommaruga.
RTR novitads 17:00