Siglir tar il cuntegn

Header

video
Reacziuns sin las schluccadas per sajettar lufs
Or da Telesguard dals 01.04.2021.
laschar ir. Durada: 1 minuta 51 Secundas.
cuntegn

Regulaziun dal luf Las reacziuns sin l'ordinaziun dal Cussegl federal

Sch'in luf fa problems, duain ils chantuns pudair intervegnir pli svelt. Quai propona il Cussegl federal en sia ordinaziun da la lescha da chatscha, ch'el ha ier tramess en consultaziun. Las reacziuns èn maschadadas.

Da nov vala: Stgarpa in luf diesch animals pitschens, sco nursas ubain chauras, pon ils chantuns intervegnir. Enfin uss eran quai 15 animals. Tar ils animals gronds sco vatgas ubain chavals bastan trais.

Reacziun dals purs

Per il pur da Falera Pius Winzap è quella varianta «nagut». Quai saja sco da «tegnair si ina lavina cun ina pala da naiv».

Quella proposta na nizzegia a nus nagut.
Autur: Pius Winzap pur da Falera

La suletta soluziun ch'el vesess fiss da decimar il dumber dals lufs sin in maximum pussaivel. El di: «Nus stuain reducir ils lufs sin in dumber che la spezia po sa mantegnair, dentant che nus pudain er viver sper il luf. En Svezia per exempel datti 300 lufs – finì.» Tenor las pli novas cifras dat quai en l'entira Svizra 110 lufs en indesch trieps.

audio
Ordinaziun per regular lufs: reacziun da purs ed uniuns d'ambient
ord Actualitad dals 01.04.2021.
laschar ir. Durada: 2 minutas 9 Secundas.

Reacziun dal WWF

Anita Mazzetta dal WWF Grischun vul anc prender pli exact sut la marella l'ordinaziun. Ella manegia dentant:

Nus essan en mintga cas pronts da porscher maun ad ina revisiun nun-cumplitgada e sperta, per ch'ins haja gia questa stad ina soluziun.
Autur: Anita Mazzetta manadra WWF Grischun

Central saja er, che las mesiras da protecziun da las muntaneras vegnian rinforzadas. Quai prevesa l'ordinaziun, sco quai stat scrit en quella duai dar dapli sustegn finanzial per la protecziun sco er ina pli gronda paletta da mesiras. La consultaziun cuzza anc enfin ils 5 da matg.

RTR actualitad 17:00

Artitgels legids il pli savens