Siglir tar il cuntegn
cuntegn

Chantun Regenza vul in mais dapli temp per sajettar lufs en Grischun

La regenza grischuna vul ch'il luf dastga vegnir sajettà sut tschertas premissas. Ella beneventa perquai da principi la revisiun parziala da la lescha da chatscha, propona però a la Confederaziun d'extender per in mais il temp durant il qual ils lufs dastgan vegnir sajettads.

Lufs giuvens dal triep dal Calanda.
Legenda: Lufs giuvens dal triep dal Calanda. Keystone

La regenza grischuna n’è betg d’accord che lufs dastgan vegnir sajettads be tranter ils 3 da schaner ed ils 31 da mars. Las experientschas da fin ussa hajan numnadamain mussà che las rotschas da lufs sa muventian surtut il december e schaner.

Perquai è il december adattà spezialmain bain per regular las rotschas lufs.
Autur: regenza grischuna

Il temp da lubientscha duai vegnir prolungà e valair a partir da l’emprim da december.

Betg a chatscha senz'examen chantunal

Quai che pertutga la reconuschientscha vicendaivla da patentas da chatscha chantunalas è la regenza grischuna però sceptica. Ella pretenda da separar cleramain tranter examens da chatscha ed il dretg d’ir a chatscha.

Tenor l’avis da la regenza ston chantuns cun chatscha da patenta perquai avair la pussaivladad da «restrenscher respectivamain da limitar» il dretg da chatscha per chaschaders ch’han nagin examen chantunal da chatscha.

RR novitads 12:00