Il post da coordinaziun duai cussegliar uffizis ed instituziuns chantunalas, duai augmentar il dumber da persunas da lingua rumantscha u taliana en l'administraziun chantunala – u ditg curt: Duai guardar che la lescha da linguas dal Grischun vegnia ademplida.
Deputadas e deputads sustegnan quell'idea – independent da lur partidas ubain derivanza linguistica. Surtut represchentantas e represchentants rumantschs e talians han dentant fatg attent, ch'il post da coordinaziun stoppia era avair las dretgas cumpetenzas per avair effect. Plinavant vegn giavischà d'instradar quel tar la Chanzlia chantunala.
Il post da coordinaziun dovra cumpetenzas – cas cuntrari creain nus in tigher senza dents.
Decider, decida la regenza
Il cusseglier guvernativ Jon Domenic Parolini è avert per talas discussiuns. Decider nua ch'il post da coordinaziun vegnia la finala dentant, gliez saja chaussa da la regenza.
Cun proponer in tal post ha la regenza reagì sin la critica dal Center per democrazia dad Aarau, ch'aveva crititgà massiv ch'il chantun promovia memia pauc la plurilinguitad.
La promoziun dal rumantsch e dal talian è ina da total 12 finamiras fixadas en il program da regenza 2021-24.
RTR novitads 16:00