Siglir tar il cuntegn
cuntegn

Chantun Regenza na duai betg far part a sesidas da la PUK

Ch'ina cumissiun d'inquisiziun parlamentara (PUK) duai sclerir ils fatgs enturn ils cartels en l'Engiadina n'è enfin ussa betg stà dispitaivel. Ussa - cura ch'ina proposta è sin maisa – van las opiniuns in ord l'auter. La regenza na duai betg esser preschenta a sesidas da la PUK, pretenda la PPS.

La sala da Cussegl grond.
Legenda: PUK – cun u senza regenza? Keystone

In commember da la regenza duai avair il dretg da far part a las sesidas e las interrogaziuns che la PUK fa. Quai propona la cumissiun da gestiun dal Cussegl grond.

La regenza è part dal problem.
Autur: Jan KochSchef da la fracziun PPS

L'influenza da la regenza sin las inquisiziuns da la PUK duain vegnir reducidas sin in minimum, ha accentuà Jan Koch (PPS) envers RTR. La finala saja la regenza part dal problem e gist pervia da quai, haja la politica grischuna actualmain in problem da fidanza. La PPS vul ussa sclerir sch'igl è giuridicamain pussaivel da stritgar quest punct. Lura vuless ella far questa proposta al Cussegl grond.

Midadas vi da lur proposta sajan tuttavia pussaivlas, di il president da la cumissiun da gestiun Robert Heinz (PBD). Quella vegnia gea anc discutada e decidida en la sessiun da zercladur dal Cussegl grond. La critica da la PPS na lascha el dentant tuttina betg valair.

La PUK po sclauder la regenza.
Autur: Robert HeinzPresident da la GPK

La cumissiun da gestiun proponia gist en in ulteriur artitgel, la pussaivladad da sclauder la regenza – per exempel per proteger perditgas.

Emprima PUK dal Grischun

Ina cumissiun d'inquisiziun parlamentara fiss ina premiera en il Grischun. Bain han differents politichers adina puspè smanatschà cun ina tala – l'ultima giada l'onn passà cura ch'il cusseglier guvernativ Mario Cavigelli n'aveva betg infurmà davart ina brev en connex cun l'iniziativa cunter la chatscha speziala. Propi instradà ina PUK n'ha il Cussegl grond dentant anc mai dapi ch'i dat quest instrument – pia dapi il 1994.

Ina PUK po il Cussegl grond instradar per sclerir eveniments da gronda muntada aifer l'administraziun statala u giudiziala. Il Cussegl grond decida ils 13 da zercladur en chaussa.

RR actualitad 17:00