Ins haja pauca chapientscha per las ponderaziuns strategicas e sa distanzieschia cleramain d'in'ulteriura reducziun da plazzas che tutgass grevamain il Grischun. Quai scriva la regenza en ina posiziun.
La regenza sa distanziescha cleramain d'ina ulteriura reducziun da plazzas, che tutgass grevamain il chantun Grischun en la situaziun economica actuala, er sch'i na dess naginas desditgas. Ella vegn a sustegnair las vischnancas tar il mantegniment d'in provediment uschè optimal sco pussaivel cun servetschs postals per la populaziun grischuna. Ils sindicats aveva gia fatg public l'entschatta dal mais ina cifra pussaivla da filialas che vegnan serradas.
La Posta sto uss suttametter propostas
La regenza spetga da la Posta ch'ella resguardia ils svilups en il mund da lavur ed elavuria concepts per spustar activamain plazzas da lavur en las regiuns perifericas. En vista a las pussaivladads tecnologicas existentas duess in tal spustament esser d'in interess economic er per la Posta. Medemamain spetga la regenza che la Posta suttamettia svelt propostas, co ch'ella vul infurmar las vischnancas grischunas e las integrar en il process areguard la strategia per la rait postala 2020.
SAB pretenda moratori
La Gruppa svizra per las regiuns da muntogna SAB fa quitads pervi da la reducziun dal provediment da basa sco per exempel tar la Posta. L'SAB pretenda perquai in moratori per la midada da la rait d'uffizis postals enfin che las cundiziuns da basa legalas èn adattadas.
Tranter auter vulan las regiuns da muntogna adattar la regla ch'in uffizi postal sto esser cuntanschibels entaifer 20 minutas per 90% da la populaziun. Questa quota sa refereschia sin la populaziun da l'entir pajais e n'exprimia nagut davart la cuntanschibladad dals uffizis postals en muntogna, crititgescha la SAB.
RR actualitad 09:00
