La raschun è d'ina vart pajaments pli pitschens ord la nova gulivaziun da finanzas naziunala. Da Berna vegn quai numnadamain a dar 17 milliuns francs pli pauc ch’il 2015. Da l'autra vart saja da quintar ch'i na dettia nagins daners da la Banca naziunala. Uschia ha declerà la ministra da finanzas Barbara Janom Steiner.
Per l'auter onn manchian uschia 16 ulteriurs milliuns francs. E sco quai ch'i vesia ora saja da quintar ch'il deficit dal chantun vegnia a crescher vinavant a partir dal 2018.
Naginas mesiras da spargn
Tenor Barbara Janom-Steiner possia il chantun sa prestar quest budget. Il chantun n’haja nagins debits e cun bun 2,7 milliardas francs chapital agen ina solida basa finanziala.
La planisaziun per 2017 fin 2019 saja dentant difficila perquai ch’i saja tranter auter da far quint cun in program da spargn da la Confederaziun. Plinavant dettia er anc divers auters facturs che pudessan influenzar negativamain il quint dals onns che vegnan. Per exempel las consequenzas da la refurma da las taxas per fatschentas 3, l’iniziativa davart segundas abitaziuns sco er las prognosas malguessas per il turissem e l’economia. Er las investiziuns en il sectur da sanadad vegnian pli autas a partir dal 2018.
RR novitads 10.00