Siglir tar il cuntegn
cuntegn

Chantun Reducì il dumber da vischnancas per la mesadad

I dat adina pli paucas vischnancas – quellas èn dentant pli grondas e pli fermas. Quai è la quintessenza dal rapport che la regenza grischuna ha laschà far. En la debatta han deputadas e deputads dal Cussegl grond dentant era fatg attent sin privels da fusiuns da vischnancas.

Grafica mussa tge vischnancas ch'èn fusiunadas.
Legenda: Reducir il dumber da vischnancas, quai è stà la strategia da la regenza grischuna. RTR grafica (funtauna: Uffizi da vischnancas GR)

Insaquants puncts dal rapport:

  • A partir dal 2019 datti anc 106 vischnancas en il Grischun
  • En las bleras vischnancas vivan 500 enfin 5'000 persunas
  • Sulet la vischnanca da Lohn dumbra pli pauc che 50 abitants
  • Il chantun ha contribuì 190 milliuns francs per fusiuns ils ultims 18 onns
  • En media da tut las vischnancas è il pe da taglia sa reducì per 10%
  • Pli paucas vischnancas han fitg gronds daivets (passa 5'000 francs pro abitant)
Legenda:
Dumber da vischnancas 2002 - 2019

Abitantas ed abitants schessan er ozendi GEA ad ina fusiun

En media 73% da la populaziun acceptassan er ozendi ina fusiun da lur vischnanca. Quai mussa il «check da fusiuns» che la scol'auta HTW ha fatg tar 27 vischnancas ch'èn vegnidas fusiunadas tranter ils onns 2008 e 2016.

La HTW ha analisà las fusiuns da vischnanca cun arguments economics (p.ex. finanzas, professiunalitad), arguments davart la qualitad da la democrazia (p.ex. participaziun, engaschament politic) e tenor facturs da la societad (p.ex. integraziun sociala, identificaziun).

«Betg tut è be grondius»

En la discussiun han surtut numerus represchentants da vischnancas fatg attent sin la realitad. Emil Müller (capo da Zernez, PBD) ha fatg attent da betg fixar memia blers detagls en il contract da fusiun:

Carmelia Maissen (presidenta da Glion, PCD) ha constatà ch'il plan da finanzas per la fusiun da Glion saja stà memia optimistic:

E per Rico Lamprecht (capo da Val Müstair, PBD) è ina fusiun era suenter 10 onns anc betg a fin:

La cussegliera guvernativa Barbara Janom Steiner ha concedì ch'i saja ina lavur immensa per las suprastanzas communalas da realisar las fusiuns da vischnancas.

I dovra simplamain bler engaschi e blera pazienza.
Autur: Barbara Janom SteinerCussegliera guvernativa

I saja er anc memia baud per valitar tut las consequenzas da las fusiuns dals ultims onns – quai stoppia vegnir evaluà en in ulteriur rapport.

RR actualitad 14:00