Siglir tar il cuntegn
cuntegn

Chantun Reclama dispitaivla - «gea, dentant...» di Jäger

Enfin ch’el na sveglia betg speranzas faussas, n’è il slogan actual dal Institut Otalpin Ftan betg in problem per il regent Martin Jäger. Quai ha el respundì oz en l’ura da dumondas dal Cussegl grond al deputà Roman Hug (PPS).

Il placat da l'institut otalpin a Ftan.
Legenda: Dispitaivel - cun quest placat fa l'Institut Otalpin da Ftan reclama a Turitg. Men Marugg

A Turitg penda ina reclama da l'Institut otalpin cun il slogan «Gymiprüfung nicht bestanden? Deswegen geht die Welt nicht unter».

Insaquants deputads en il Cussegl grond èn cleramain da l'opiniun, che quel slogan na saja betg ina buna reclama per il chantun Grischun.

«Cun quest slogan na metta la scola betg il focus sin la qualitad da la scola, mabain sin quel dals uffants da famiglias ritgas», di per exempel Jon Pult da la PS. Il slogan sappia vegnir interpretà uschia, ch'ins possia cumprar a Ftan la matura.

Per auters deputads n'è il slogan betg problematic. «Ins duai gea avair anc ina giada ina schanza, sch'insatge na gartegia betg», di Gabriela Tomaschett-Berther da la PCD.

«Betg far faussas speranzas»

Ins possia tuttavia chapir fauss la reclama da l'Institut Otalpin a Ftan, ha il cusseglier guvernativ Martin Jäger respundì en l'ura da dumondas dal Cussegl grond.

Ils placats sajan dentant giustifitgabels, uschè ditg ch'il HIF na fetschia betg faussas speranzas als scolars ed uschè ditg ch'el resguardia la lescha tar ils examens d'admissiun.