L’uffizi da migraziun quinta questa stad cun passa 30'000 novs fugitivs e requirents d’asil. Ina part da quels pudessan er vegnir surdads al Grischun, ha ditg il schef dal departament da segirtad, Christian Rathgeb.
Per il cas ch’il Grischun avess da dar albiert entaifer curt temp a blers fugitivs, haja il chantun gia instradà contractivas cun differentas vischnancas. Tgeninas n’ha Rathgeb betg vulì tradir. El spera dentant ch’i na dovria betg novs centers per requirents d’asil, malgrà ch’ils existents èn actualmain gia per gronda part occupads. Ins stuess probablamain arver intgins cundrizs sutterans per porscher albiert.
Christian Rathgeb pretenda dentant era cleramain ch'il chantun stoppia survegnir ad uras las infurmaziuns da la Confederaziun. Era dovria la guardia da cunfin cleramain dapli persunal, ma quai n'haja la Confederaziun anc betg reglà uschia ch'i cuntentia. Ma cun l'administraziun funcziunia la collavuraziun bain. I saja dentant impurtant che las plazzas pertutgadas en l'administraziun hajan avunda persunal per reglar lur lavur a moda cuntentaivla.
RR novitads 15:00