Rathgeb: Berna duai reagir sin novas rutas da fugitivs

Tenor il Cusseglier federal Ueli Maurer arrivan ils fugitivs da nov en Svizra sur las Valladas dal sid grischunas per lura ir vinavant en la Germania e l'Austria. Era en il chantun Tessin arrivian blers fugitivs.

Il cusseglier guvernativ grischun Christian Rathgeb conferma ch'ins observeschia las rutas gia dapi l'atun passà ed haja ussa l'emprima giada constatà ina gruppa da fugitivs pli gronda (14 persunas) che vuleva immigrar sur il Grischun; numnadamain tras la Val Puschlav.

Il chantun spetga ussa era che la Confederaziun reageschia – concret cun disponer guardias da cunfin svizras en il Grischun. La Confederaziun saja numnadamain responsabla per tractar ils cas ed als reparter sin ils centers transitorics per requirents d'asil.

Cusseglier federal Ueli Maurer fa quitads

Quitads fa il mument a Cusseglier federal Ueli Maurer che blers fugitivs viageschan sur las Valladas dal sid grischunas en Svizra. Quai surtut per pudair viagiar vinavant en direcziun da l’Austria e la Germania. Perquai dettia quai ils emprims indizis, «Ils cuntrabandists d’umans emprovan uss probabel, sche la ruta sur il Grischun saja pli simpla che sur Chiasso», aveva Maurer ditg envers radio SRF. Maurer tema, ch’ils proxims dis vegnian dapli fugitivs sur il Puschlav e la Val Müstair en Svizra. Il mument vegnia la guardia da cunfin senza problems a frida cun la situaziun, ha ditg Maurer.

Ruta sur Domodossola en Svizra bunamain cifras da record

En il sid da la Svizra crescha il dumber da fugitivs ils ultims dis marcantamain, ha ditg Ueli Maurer. A Chiasso e sin la ruta da Domodossola a Brig sajan ins datiers da las cifras da record. La guardia da cunfin en il Tessin è perquai vegnida rinforzada cun ulteriur persunal. «Il mument vegn fatg servetsch da 24 uras», ha ditg Maurer parsura da la guardia da cunfin. «Migrants arrivan savens cunter mesanotg e betg durant il di.»

Il mument nagin militar

Cusseglier federal Ueli Maurer ha dentant dementì plirs rapports da medias ch’el e ses collega da la Partida populara svizra Guy Parmelin planiseschian in engaschi dal militar al cunfin. Bun 80% fin 90% dals migrants vegnan en trens normals.

RR novitads 08:30