Siglir tar il cuntegn
Inhalt

Chantun Raischens èn uss er uffizialmain in privel en Surselva

Las vischnancas da Breil, Trun e Sumvitg valan quest onn da nov sco regiuns da risico quai che pertutga raischens. La culpa da quai èn trais cas da FSME ch’èn vegnids registrads ils davos dus onns en quellas vischnancas.

Carta svizra che mussa vischnancas ch'èn en privel da raischens cun il virus FSME.
Legenda: Survista da zonas da privel per raischens cun il virus FSME. Confederaziun: map.geo.admin.ch

Enfin uss valevan cunzunt la Val dal Rain, la regiun da Cuira ni era il Partenz sco regiuns da risico per survegnir in’inflammaziun da tscharvè entras in raischen.

Dapi quest onn èn dentant era trais vischnancas en Surselva en la zona da risico quai che pertutga infecziuns dad FSME. Quai pervia ch’il privel da raischens cun il virus è en general creschi e perquai ch’i ha dà cas da persunas ch'èn s'infectadas, quai di Daniel Koch da l'uffizi federal da sanadad.

Paucs cas pon midar la carta

Concret haja dà a Breil, Trun e Sumvitg trais infecziuns en ils davos dus onns, uschia il medi dal chantun Martin Mani. Daco ch’i haja gist dà cas en la Cadi saja tenor il medi dal chantun Martin Mani grev da dir.

Entras la midada da clima san raischens cun il virus surviver enfin milli meters sur mar. Arrivads sajan ils raischens probablamain entras la selvaschina. Tschiervs, chavriels u vulps transportian sin lur viadis era ils animalets che tschitschan sang.

Diember d'infecziuns cun il virus FSME


2016
2015
2014
CH
201
123111
GR12612

Virola vegn pajada

Per ils abitants da las vischnancas en Surselva ch’èn danovamain en la zona da privel munta quai che la cassa da malsauns surpredan la virola cunter il virus dad FSME.

Plinavant stoppian tut quels che sajan magari en la natira esser precauts e conscients ch’i dettia raischens malsegirs.