Siglir tar il cuntegn
Inhalt

Chantun Radunanzas communalas daventan publicas

Il Cussegl grond ha prendì emprimas decisiuns aifer la lescha da vischnancas: Era possessurs da segundas abitaziuns e schurnalists dastgan esser preschents a las radunanzas communalas. Il Cussegl grond ha decidì da far public quellas.

Legende: Video Lescha da vischnancas – Radunanzas communalas èn en futur publicas abspielen. Laufzeit 02:35 Minuten.
Or da Telesguard dals 17.10.2017.

Il Cussegl grond è uschia suandà la regenza grischuna. Lezza aveva insistì sin sia proposta da radunanzas communalas publicas, malgrà ch'igl ha dà blera critica durant la consultaziun.

Discussiun animada davart radunanzas publicas

Deputadas e deputads han decidì cun 63 cunter 51 vuschs da far publicas las radunanzas communalas. Ordavant han deputadas e deputads discutà questa proposta glindesdi saira e mardi bun'ura.

A Silvaplauna avain fatg fitg bunas experientschas cun radunanzas communalas publicas.
Autur: Claudia TroncanaDeputada PLD ed ex-presidenta da Silvaplauna

Sustegn per sia proposta da far publicas las radunanzas communalas ha la regenza grischuna survegnì da la Partida socialdemocratica e da la Partida liberala.

Politichers burgaisdemocratics e cristiandemocratics èn sa dustads cunter radunanzas publicas. Ils preschents na possian betg discurrer avertamain, sche schurnalists sajan en sala – è stà in dals arguments.

A radunanzas publicas vegnan pli paucs votants e persuenter dapli persunas mirvegliusas.
Autur: Emil MüllerDeputà PBD e president da Zernez

Las vischnancas duajan pudair decider sezzas, sche lur radunanzas duain esser publicas u betg e fixar quai en lur lescha communala, han argumentà ils adversaris.

Almain trais suprastants communals

Il Cussegl grond ha dentant era prendì ina decisiun cunter la veglia da la regenza grischuna: Las suprastanzas communalas duain avair almain trais commembers, quai han deputadas e deputads decidì sin proposta da Walter Grass (PBD). El è president communal dad Urmein – ina vischnanca che ha gia oz be trais suprastants communals. Urmein e Runtgaglia èn las sulettas vischnancas cun quest sistem – sper la citad da Cuira, che ha perencunter in parlament communal e trais suprastants en pensum cumplain.

La cussegliera guvernativa Barbara Janom Steiner ha defendì adumbatten la proposta da la regenza cun almain tschintg suprastants.

Vischnancas burgaisas domineschan debatta d'entrada

Il Cussegl grond ha decidì glindesdi suentermezdi d'entrar en la debatta ed ha refusà cleramain ina proposta da la PS da trametter enavos a la regenza la fatschenta.

La debatta d'entrada è lura sa sviluppada ad ina discussiun da princip davart l'existenza da las vischnancas burgaisas. Durant bunamain duas uras han deputadas e deputads discutà davart senn e nunsenn da las vischnancas burgaisas. Sco suletta partida vuleva la PS abolir las vischnancas burgaisas.

La cussegliera guvernativa Barbara Janom Steiner (PBD) ha accentuà ch'i na giaja en la lescha da vischnancas betg en emprima lingia per las vischnancas burgaisas, mabain per las incumbensas da las vischnancas politicas. Abolir las vischnancas burgaisas na saja nagina opziun e na saja era betg giavischà.

La revisiun totala da la lescha da vischnancas è la fatschenta principala da la sessiun d'october.

RR novitads 15:00++