Siglir tar il cuntegn

Header

cuntegn

Chantun «Quants lufs accepta il Grischun?»

Per ina part da la populaziun è il luf in privel imminent, auters admiran el. Tenor Georg Brosi da l'uffizi da chatscha n'è la dumonda betg quants lufs ch'han plaz tar nus, mabain quants che la societad è pronta d'acceptar. Uschia è Brosi s'exprimi al podium da discussiun davart il luf a Cuira.

La debatta davart co che la societad duai ir enturn cun il luf, è stada cuntroversa e chargiada cun emoziuns. Entant ch’ils aderents èn persvas che l’uman ed il luf pon viver in dasper l’auter, èn ils adversaris da l’avis che l’animal da rapina n’ha betg plaz en Svizra.

Carta dal Grischun nua ch'il luf è vegnì vesì.
Legenda: RTR

Discrepanza tranter citad e campagna

Durant il podium èsi sa cristallisà che la glieud da la citad è savens per il luf, quella da la champagna plitost encunter. Tranter auter èsi er vegnì discutà davart la scena dal luf en il film «Uorsin».

Qua vegnia preschentà il luf sco animal che n'ha betg grond respect da l'uman. Per tscherts participants dal podium è quai in zic problematic. Ils promoturs han però menziunà il fatg ch'i n'ha durant decennis dà nagins accidents tranter lufs ed umans. In concept final n’è anc betg sin maisa. Scienziads, politichers e differentas instituziuns vegnan anc a stuair sa deditgar intensivamain a quest tema.

audio
Mezdi: Co va la societad enturn cun ils lufs
ord Actualitad dals 11.03.2016.
laschar ir. Durada: 3 minutas 56 Secundas.

Il podium da discussiun è vegnì organisà communablamain da l'Institut per l'antropologia sociala da l'universitad da Turitg e la Perscrutaziun da cultura grischuna.

Artitgels legids il pli savens