Siglir tar il cuntegn
cuntegn

Chantun Qua sto anc vegnir dapli!

En pli pauc che sis emnas decida la populaziun Grischuna davart ina candidatura da gieus olimpics en Grischun. En las raits socialas mancan dentant anc las emoziuns.

Cusseglier guvernativ Jon Domenic Parolini vesa anc grond potenzial en la promoziun online.
Legenda: Cusseglier guvernativ Jon Domenic Parolini vesa anc grond potenzial en la promoziun online. Gian-Marco Maissen

Radund 2’300 likes han ils promoturs dals gieus olimpics 2026 en Grischun sin Facebook. La pagina da la candidatura 2022 ha 3’800 likes u auter ditg 1’500 dapli. Da quella giada avevan las Liricas Analas anc publitgà ina chanzun per la candidatura. Ins ha uschè pruvà da crear emoziuns e da persvader la populaziun per quest grond project. Senza success.

Quest onn n’è anc strusch capità insatge. Quai ha procurà per differentas discussiuns. Ils promoturs empermettan dentant ch’il fieu duai gia bainbaud vegnì empizzì. Ins haja anc vulì spetgar fin suenter ils dis da festa.

Remo Cavegn è persvadi che ils promoturs rivan anc cun las emoziuns en las raits socialas.
Legenda: Remo Cavegn è persvadi che ils promoturs rivan anc cun las emoziuns en las raits socialas. Gian-Marco Maissen

Betg mo online promover la candidatura

Cusseglier guvernativ Jon Domenic Parolini sco era il cusseglier grond Remo Cavegn èn perencletgs ch’ils promoturs stoppian anc far dapli online. Dentant han era omadus manegià ch'era ils vecturs tradiziunals hajan ina rolla impurtanta en vista a la votaziun ils dudesch da favrer. I vegn ad esser la sfida da crear simpatias ed emoziuns sin tut ils differents vecturs per cuntanscher a giuven e vegl, uschia ils dus politichers grischuns.

RR actualitad 07:00