Siglir tar il cuntegn

Header

cuntegn

Chantun PVL - Success era senza colliaziun da glista

Christian Stricker, il president dals Verd-liberals dal Grischun, è persvadì che Josias Gasser ha bunas schanzas da vegnir reelegì sco cusseglier naziunal. Quai era senza ina colliaziun da glista sco avant 4 onns cun ils socialdemocrats, ha Stricker ditg ad RTR.

Ch’Andreas Thöny, il schef da fracziun da la PS en il Cussegl grond e candidat per las elecziun federala en il Cussegl naziunal, è trumpà. El è trumpà da la politica da Josias Gasser e dals Verd-liberals, ed el na chapescha betg propi ch’ils socialdemocrats mettan perquai en dumonda ina colliaziun da glista.

Per la PVL na vul ina colliaziun da glista betg dir ch’ins stoppia era far la medem politica, ni esser dal medem avis en la politica ha Christian Stricker manegià.

Ina colliaziun da glista è nagut auter ch’in med aritmetic per maximar las schanzas da vegnir elegì.
Autur: Christian Stricker president Partida verd-liberala dal Grischun

Mintga partida che fetschia ina colliaziun da glista, stoppia la fin finala esser persvadida che la colliaziun da glista gidia ses candidat.

Meglras schanzas cun colliaziun

Che Josias Gasser ha bain meglras schanzas da vegnir reelegì sco cusseglier naziunal cun ina colliaziun da glistas, conceda er el. Dentant i dettia blers temas politics en ils quals el craja che Josias Gasser saja la dretga persuna per il Grischun giu Berna: uschia per exempel en la tematica da la midada da l’energia ed il privel per las ovras idraulicas grischunas, la realisaziun da l’iniziativa cunter l’immigraziun da massa e l’iniziativa da abitaziuns secundaras ni il ferm franc svizzer ed il squitsch sin noss turissem.

Ils Verds-liberals dal Grischun nomineschan lur candidats per las elecziuns federalas dals 18 d’october la fin da mars. Cler è fin ussa be che Josias Gasser è lur top candidat per las elecziuns. Ulteriurs candidats pussibels per in sez a Berna, n’ha Christian Stricker anc betg vulì tradir.

Artitgels legids il pli savens