Siglir tar il cuntegn

Chantun Puspè curs da rumantsch per uffants en la Bassa

Tant a Turitg sco a Basilea pon uffants puspè visitar l’onn da scola 2015/16 lecziuns da rumantsch. Quai è gia per la segunda giada che tals curs han lieu, quai sin iniziativa da la Quarta Lingua e da la Lia Rumantscha.

Uffants rumantschs da la Bassa durant in’ura d’instrucziun.
Legenda: Uffants rumantschs da la Bassa durant in’ura d’instrucziun. Lia Rumantscha

A Basilea-Citad frequentan var 10 scolaras e scolars da 7 fin 12 onns l’instrucziun rumantscha mintgamai la sonda en damaun. Grazia a ferm sustegn è il curs gratuit.

Il curs per ils uffants dal chantun Turitg e conturn cumenza ils 2 da settember. Mintgamai la mesemna suentermezdi datti in’instrucziun adattada tenor stgalims. In onn da curs custa 100 francs per uffant. Per geniturs ed uffants èsi pussaivel da prender part ad in’ura d’emprova.