Mintg'onn da quai temp ston ils deputads dal Cussegl grond eleger lur president. E mintg'onn da quai temp èsi gia cler tgi che vegn elegì. La raschun per quai è che la conferenza dals presidents da fracziun han fixà in turnus e quai tenor la grondezza da la fracziun. Pli gronda che la fracziun è e pli savens ch'ella vegn vidlonder.
Partidas burgaisas top - PPS flop
Quai munta che PLD, PCD e PBD èn quellas partidas che vegnan vidlonder il pli savens, la PS vegn er anc vidlonder mintgatant. La PPS è il mument dentant memia pitschna. Las fracziuns èn libras a tgi ch'ellas vulan surdar il post.
I dat dentant duas variantas. U ch'ins vul dir engrazia ad insatgi per la buna lavur prestada u ch'ins vul promover la profilaziun d'insatgi.
Fitg blera lavur
Tenor ils presidents da las fracziuns na dastgian ins dentant betg emblidar ch'il post sco pli aut Grischun munta er fitg blera lavur. I saja cunzunt da represchentar fitg savens, sper quai èsi da preparar e da manar las sessiuns dal Cussegl grond. Uschia ch'i saja savens gnanc uschè simpel da chattar insatgi che vul insumma far quella lavur.
RR actualitad 07:00