Ladina Mayer da Bever fa dapi 30 onns la pura. Ella ha visità la dieta en il Plantahof a Landquart per survegnir novs inputs pertutgant il svilup da l'agricultura en il Grischun ina dieta organisada da l'uffizi Grischun per agricultura.
Daners èn avant maun
Il chantun ha ina cassa per sustegnair projects innovativs. Projects a lunga vista, projects sur l'agricultura or, projects per l'entira regiun che cumpiglian per exempel er la vischnanca ubain il turissem. Da quels mancan numnadamain al chantun. Per Ladina Mayer è er clar pertge. Per l'ina na ristgan ils purs betg adina da far uschè in project. Els ston numnadamain er investir sez la gronda part da las finanzas. Per l'autra sajan las prescripziuns bler memia cumplitgadas. «Sch'insatgi vul far insatge, sche va quai onns», di Ladina Mayer.
Perscripziuns frainan il svilup
Ed er il manader da l'uffizi Daniel Buschauer è pertschart, che las prescripziuns per survegnir daners èn severas. Quellas sajan cunzunt per persvader la Confederaziun. E perquai vuless il chantun lura er sa gidar da purtar projects a la finamira, vul dir: tras la controlla a Berna. Buschauer è numnadamain persvadì: «il potenzial fiss anc gronds per projects innovativs en il Grischun.» Ed er ideas fissen qua, dentant i duvrass per las ideas insatgi, che tira il char.
RR actualitad 17:00