Siglir tar il cuntegn
cuntegn

Chantun Project da pilot: GR e TI pon barattar collavuraturs

Il secretariat statal per economia SECO ha dà glisch verda al project da pilot da barattar collavuraturs tranter il Grischun ed il Tessin. La finamira dal project è d'evitar ch'ils stagiunaris en la hotellaria èn senza lavur durant las stagiuns, nua ch'i marscha pli pauc.

Purtret d'in camarier cun enta maun in tablar da gervosa.
Legenda: Plazzas da stagiuns procuran per sfidas per stagiunaris e per patruns. Keystone

Il project è vegnì lantschà avant bun dus onns da la HTW a Cuira. La finamira dal project è ch'ils hotels en il Grischun ed il Tessin partan lur collavuraturs per uschia evitar che quels èn senza lavur durant las stagiuns ch'i marscha pauc.

Concret munta quai che stagiunaris duain vegnir recumpensads sch'els èn annunziads tar il program da parter collavuraturs ed han duas plazzas da stagiun, ina da stad ed ina d'enviern. Sch'els pon mussar si tar la plattafurma ch'els han gia ina proxima plazza, na ston els betg sa spruvar da survegnir ina plazza per incassar maximalamain 6 emnas ad onn indemnisaziun per persunas dischoccupadas. Uschia pon vegnir surmuntadas pitschnas luccas da paja tranter las stagiuns a moda nunbirocratica.

Il project cumenza l'entschatta da l'auter onn e cuzza trais onns.

RR novitads 16:00