Siglir tar il cuntegn
Inhalt

Chantun Prevenziun internaziunala cunter accidents cun motos

Ensemen cun la polizia di stato vegn la polizia chantunala dal Grischun a far ina prevenziun cunter accidents cun motos il cumenzament da fanadur en la Vuclina. Ella ha lieu en il rom da la scuntrada annuala da motos «Motoraduno Stelvio International».

Polizia taliana ensemen cun la polizia grischuna.
Legenda: Polizia taliana ensemen cun la polizia grischuna. MAD

Per la scuntrada annuala da motos «Motoraduno Stelvio International» da venderdi, ils 30 da zercladur fin dumengia, ils 2 da fanadur 2017, vegnan spetgads a Sondalo (I) passa 20’000 participantas e participants. Per minimar il privel d'accidents da traffic rinforza la polizia chantunala dal Grischun durant quest temp sia preschientscha sin ils trajects da transit en l'Engiadina sco er en las valladas cunfinantas e sin ils pass vischins.

Focus sin la repressiun

Sco ils onns passads vegnan fatgas controllas da traffic sistematicas. En il focus stat l'observaziun da las sveltezzas maximalas sco er la controlla che las motos correspundian a las prescripziuns. Ma er l'observaziun da tut las autras prescripziuns da traffic vegn controllada.

Focus transcunfinal sin la prevenziun

Il vitg Sondalo (I) vegn a daventar – sper il Pass dal Stelvio – in ulteriur center da la scuntrada. En la zona da peduns da Sondalo (I) installescha la polizia chantunala dal Grischun ensemen cun la polizia di stato in stan da prevenziun. Per uffants datti la pussaivladad da sa laschar fotografar en vehichels da servetsch u sin motos da polizia da tuts dus corps da polizia. Ultra da quai è là er il «pullman azzurro» enconuschent en l'Italia, ina stanza da scolaziun multimediala per l'instrucziun da traffic.

Dialog cun las motociclistas ed ils motociclists

En l'aula da Sondalo (I) vegnan mussads videos da modas da guidar privlusas e d'accidents da traffic reals. Cun quai persequitescha la polizia la finamira d'entrar en discussiuns constructivas cun las motociclistas ed ils motociclists. Sco segn da renconuschientscha e sco regurdanza vegn surdà a las participantas ed als participants in faziel da culiez multifuncziunal.

RR novitads 11.00