Siglir tar il cuntegn

Header

cuntegn

Chantun Pretschs dad immobiglias èn crudads

Il gea a l'iniziativa cunter abitaziuns secundaras ha smatgà ils pretschs da las abitaziuns e chasas en las vischnancas pertutgadas.

Quai mussa in studi dal biro d'immobiglias Wüst Partner che ha analisà ils pretschs en 131 vischnancas. Las gasettas Tages-Anzeiger e der Bund han rapportà il glindesdi en chaussa.

Moviments dals pretschs betg dapertut tuttina

Tranter il 2013 ed il 2016 sajan ils pretschs per proprietad d'abitar sa sbassads en blers lieus da turissem cun ina gronda cumpart d'abitaziuns secundaras. Il studi mussa pli enavant, che 15 da las 20 vischnancas las pli pertutgadas èn ils chantuns Grischun e Valais.

Cifras per il Grischun dattan ils auturs dal studi era. A San Murezzan sajan ils pretschs per proprietad d'abitar sa sbassads per 12 pertschient, a Puntraschigna per 14 pertschient ed a Bravuogn perfin per 21 pertschient. Il trend negativ n’ha dentant betg tschiffà tut ils lieus turistics: En 77 da 131 vischnancas analisadas èn ils pretschs restads stabil u schizunt augmentads.

Il mars 2012 aveva il suveran svizzer acceptà l’iniziativa da segundas abitaziuns cun 50,6% gea. Trais onns suenter ha il parlament deliberà la lescha federala davart las segundas abitaziuns.

RR novitads 17:00

Artitgels legids il pli savens