La giuventetgna dad ozendi s'interesseschia numnadamain schon per politica, er sch'ins audia mintgatant che giuvnas e giuvens na giajan betg a votar. Ins stoppia be chattar temas actuals e dar in lieu per discutar, han ils politichers giuvens ditg oz a Cuira. Ina tala chaschun saja la sessiun da giuventetgna: Giuvnas e giuvens tranter 16 e 25 onns duain survegnir mirveglias da politica, discutar temas e proponer ideas. Ils 120 participants da la sessiun da giuventetgna discuteschan durant 2 dis ils temas:
- energia
- mastergn e famiglia
- politica da linguas en il Grischun
- sortida / vita nocturna
- participaziun da la giuventetgna
- segirtad
Silsuenter vegnan surdadas 6 petiziuns al Cussegl grond, che tracta quellas en ina da sias sessiuns.
«Jau vegn a guardar sin la detta a quels vegls, sch'els na piglian betg serius las ideas da la giuventetgna»
Tino Schneider, co-president da la sessiun da giuventetgna e deputà en il Cussegl grond.
Brand, Pult, Candinas & co sco figuras dad action
Ils organisaturs han creà in nov motto «Prenda sez enta pugn la politica grischuna». Els ha persvadì politichers prominents da sa metter en posa sco figuras dad action ed uschia da far reclama per la sessiun da giuventetgna dal Grischun.
«Nus vulain mussar che la politica po esser divertenta e legra - e betg adina mo seriusa»
Manuela Fetz, co-presidenta da la sessiun da giuventetgna