Siglir tar il cuntegn

Chantun Premi schurnalistic SRG.R 2014 per Petra Rothmund

Il Cussegl dal public SRG.R (CP SRG.R) ha surdà oz il premi schurnalistic SRG.R 2014 a Petra Rothmund. Ella è vegnida onurada per il film «Dal Magic Wood al Action Wood».

Petra Rothmund, la victura dal premi schurnalistic SRG.R 2014
Legenda: Petra Rothmund survegn il premi schurnalistic SRG.R 2014 per ses film "Dal Magic Wood al Action Wood". RTR, G. Maissen

L’emissiun viva da cuntrasts da stil, da differentas avischinaziuns a temas variads. L’emissiun emnila da 25 minutas preschenta e reflectescha temas relevants per la Svizra Rumantscha e per il Grischun.

Il Premi schurnalistic SRG.R onurescha products schurnalistics da la chasa RTR. La giuria, che consista da tschintg commembers dal CP SRG.R, ha tadlà e guardà tut las 30 contribuziuns inoltradas. Per il premi schurnalistic SRG.R 2014 ha ella nominà las suandantas emissiuns e contribuziuns:

  • «Punt Tamina Top (Telesguard)» Fliri Curdin (televisiun)
  • «Candi-Cartoon» Kreiliger Peter e ses team (online)
  • «Viver cun ed il medem mument senza sia dunna» Rominger Violanta (radio)
  • «Dal Magic Wood al Action Wood» Rothmund Petra (televisiun)
  • «Il misteri da Bargun, cronica d’in mazzament da chatscha» Venzin Gieri (televisiun)

Da questas propostas han ils commembers dal CP SRG.R lura tschernì la victura Petra Rothmund cun il film «Dal Magic Wood al Action Wood». Il premi è dotà cun CHF 6’000.00.

Legenda: Guardar il video «Premi schurnalistic SRG.R per Petra Rothmund». Durada 2:36 minutas.
Or da Telesguard dals 08.04.2015.

«Dal Magic Wood al Action Wood»

Petra Rothmund ha realisà il film ch’è vegnì emess l’emprima giada il november 2014. Il film mussa bleras fassettas ed ina cuntrada particulara en noss intschess. Ils Cuntrasts conferman ch’ins cuntanscha cun bainvulientscha e toleranza ina schliaziun. Ils maletgs dattan invista en in mund mirveglius strusch scuvrì. Quest lieu magic è dentant enconuschent en la scena da bouldrar lunsch sur ils cunfins svizzers ora.

Libertad da las medias – independenza da la pressa, radio e TV

En ses referat ha Larissa M. Bieler reflectà la libertad da las medias. Ella è schefredactura da la gasetta «Bündner Tagblatt» BT a Cuira ed uschia l’emprima dunna a la testa dad ina gasetta quotidiana dal Grischun.