Siglir tar il cuntegn
Inhalt

Chantun Premi Arge Alp 2017 va a Tavau

Il project «Ospitalitad senza cunfins en il vitg da Tavau avert» survegn in dals trais premis ch'è dotà cun 6'000 euros. Quai communitgescha la Chanzlia chantunala dal Grischun.

L’uniun cuminanza d’interess per in Tavau avert ha lantschà quest project che sustegn requirents d’asil e fugitivs a schliar problems dal mintgadi. Era ha questa uniun organisà passa 70 occurrenzas interculturalas sco er in post da contact cun ils indigens. Tras l'engaschament da l'uniun regia uss ina tenuta generalmain positiva envers fugitivs en la regiun. En tut eran vegnids inoltrads passa 100 projects d’integraziun or da tut las regiuns da l'Arge Alp.

Grischun al timun

Per l'onn 2018 ha uss il Grischun tenor turnus il timun da l'Arge Alp. En il center duai star la forza idraulica. Il Grischun vul cunzunt mussar l'impurtanza economica e las schanzas che la forza idraulica porta a las regiuns da las alps. Quai duai capitar cun in simposi durant l'onn da timun grischun e duas resoluziuns per il zercladur 2018 che duain far attent sin l'impurtanza da la forza idraulica ed ulteriurs basegns sco p. ex. la politica da furmaziun en las regiuns alpinas.

Ulteriurs projects grischuns èn la Arge-Alp èn: In campus online per il spazi alpin che duai far attent sin la purschida da furmaziun e perscrutaziun en las regiuns alpinas. In segund project è Arge Alp Sport. In project che gira dapi 10 onns e promova ina vita sanadaivla e cun moviment. L'onn passà èn bunamain 1830 sportistas e sportists sa participads a nov eveniments da sport en l'entir intschess da l'Arge Alp.

RR novitads 15:00

Tge è la Arge Alp?

L'Arge Alp è ina cuminanza da lavur tranter las regiuns da las alps en la Germania, Italia, Austria e Svizra. Las suandantas regiuns cun bun 26 milliuns abitants lavuran ensemen:

  • Baviera
  • Grischun
  • Lumbardia
  • Salzburg
  • Son Gagl
  • Tirol dal Sid
  • Tessin
  • Tirol
  • Trient
  • Vorarlberg