Siglir tar il cuntegn
Inhalt

Chantun «Predir bovas n'è quasi betg pussibel»

Ils da Scuol n'han tenor la valitaziun da privel dal chantun betg pli dad avair tema da bovas. Il mender saja passà. Las grondas chargias material sajan vegnidas cun las emprimas bovas, uschia Martin Keiser responsabel per privels da la natira dal chantun en la regiun Grischun dal sid.

A Pradella èn gievgia saira duas bovas idas a val en la Val Lischana e la Val Triazza.
Legenda: A Pradella ha ina bova chaschuna gronds donns la gievgia saira. ANR, A. Filli

Tuttina pudess la Clozza anc purtar a val inqual rests da la bova, sche la daratga vegn anc ina giada la fin d'emna. La Clozza è era marcada sin la carta da privel dal chantun, ina carta che mussa a las vischnancas, tge lieus ch'èn periclitads da bovas. E quai èn blers lieus.

Ir en segirezza, sche la bova vegn

Sco quai che Andreas Huwiler da l'uffizi chantunal per privels da la natira di, èn numerusas vischnancas bajegiadas sin uschenumnads «cugns da bovas». Ord quest motiv èn era bleras vischnancas periclitadas.

Malgrà la charta da privel e la savida che periodas sitgas promovan la furmaziun da bovas, na saja quai quasi betg pussibel da predir ina bova. Ins sappia bain nua che la bova pudessia vegnir, ma betg cura. Quai dependia fitg da l'urizi e quant ditg ch'i daratga en il medem lieu.

Il meglier saja da laschar avert ils egls e dad ir en segirezza, sche la bova vegn, vul dir, star en chasa e sche pussaivel ir en l'emprima auzada.