Siglir tar il cuntegn

Header

Navigaziun

Legenda: Guardar il video Plitost dapli PBD e damain PPS. Durada 02:05 minutas.
Or da Telesguard dals 01.10.2015.
cuntegn

Chantun PPS perdess a la PBD, resta però la gronda

Avessan Grischunas e Grischun elegì il settember ils parlamentaris federals, lura restass la Partida populara Svizra (PPS) cun 24% da las vuschs vinavant la pli gronda partida. Quai resulta da la retschertga da l'institut DemoSCOPE per RTR, Südostschweiz ed il radio regiunal da SRF.

Dapi l'ultima retschertga da l'institut DemoSCOPE per incumbensa dad RTR e la Südostschweiz-Medien perda la Partida populara Svizra (PPS) però 2,8%. Tenor Werner Reimann da DemoSCOPE va questa perdita da la PPS il pli probabel en favur da la Partida burgaisdemocratica (PBD). Per el è quai plausibel, perquai che la PPS perda surtut en las regiuns ruralas.

Trend negativ da la PLD cuntinuescha

La Partida liberaldemocrata PLD ha puspè stuì laschar plimas. Ella perda 3% vers la retschertga da l'avust ed avess ussa anc fatg 11,3%. Resguardond il trend positiv da la partida mamma svizra, che registrescha actualmain in trend positiv, è quai ina surpraisa.

Ulteriuras partidas stabilas en il Grischun

La Partida cristiandemocratica (PCD) resta tenor la retschertga relativ stabila cun in pitschen plus da 0,1% en congual cun l'ultima retschertga. Ella resta era cleramain francada en la Surselva, nua ch'ella va per passa in terz da tut las vuschs: quai avant il Grischun central cun prest in 5avel da las vuschs per la PCD. La Partida socialdemocratica (PS) è era constanta cun in plus da 0,3%, la Partida verd-liberala (PVL) cun in plus da 0,2%.

La retschertga en cumparegliaziun cun 2011

  • PPS avess 24,1% (-0,4%)
  • PBD avess 20,3% (-0,2%)
  • PS avess 16,1% (+0,5%)
  • PLD avess 11,3% (-0,6%)
  • PCD avess 14,4% (-2,2%)
  • PVL avess 5,9% (-2,4%)

La retschertga

L'institut DemoSCOPE ha fatg al telefon cun 1'200 persunas maiorennas tranter ils 14 ed ils 26 da settember; quai sin incumbensa da RTR, Radio SRF1 e la Südostschweiz. 738 da questas han numnà ina partida ch'els elegessan quel di. La toleranza dals resultats è tranter +/- 3,6%.