Siglir tar il cuntegn
cuntegn

Chantun Post dal directur dal museum d'art è vacant

Martin Jäger ha sistì la decisiun d'avant 6 dis. Sin dumonda dad RTR ha el precisà che Stephan Kunz na turnia betg al timun dal museum d'art Grischun. La plazza saja vacanta - enfin che l'organisaziun saja analisada.

Purtret dal museum d'art.
Legenda: Il museum d'art a Cuira n'ha il mument nagin directur. RTR, Lea Livers

L'irritaziun è stada gronda cura ch'il Departement d'educaziun, cultura ed ambient EKUD ha tramess ina curta communicaziun cun l'infurmaziun ch'il cusseglier guvernativ Martin Jäger (PS) haja decis da sistir la reorganisaziun ch'era vegnida communitgada ils 14 da zercladur. Lura aveva el decis ch'il directur dal museum d'art dal Grischun Stephan Kunz vegnia remplazzà entras Nicole Seeberger. Questa decisiun ha procurà per chaus cotschens en la scena da cultura.

Sco Martin Jäger ha declerà sin dumonda dad RTR muntia sistir dentant betg che Stephan Kunz stettia al timun dal museum d'art. La plazza saja ussa vacanta enfin che las scleriziuns necessarias sajan fatgas. Il resultat vegnia communitgà uschè spert sco pussaivel.

Stephan Kunz, è stà directur dal museum d'art.
Legenda: Stephan Kunz, è stà directur dal museum d'art. Keystone

Demonstraziun ha tuttina lieu

La gruppa d'acziun «Kunzt first» ch'aveva annunzià da vulair demonstrar mesemna saira a Cuira resta tar ses plan. «Sistir po muntar ina massa», ha Pius Tschumi scrit ad RTR. E vinavant: «Nus pretendain transparenza en las decisiuns da persunal ed insistain che Stephan Kunz daventia puspè directur.»

Entant rimnan cerchels culturals suttascripziuns en l'interent per ina nota da protest. Gia passa milli persunas da l'entira Svizra han suttascrit e pretendan che l'uffizi da cultura vegnia dilucidà.

PS na saveva nagut da la sistida

La partida da cusseglier guvernativ Martin Jäger beneventa ses agir. Sin dumonda ha il president da la PS, Philipp Wilhelm ditg, ch'el haja bain gì contact cun Jäger ils ultims dis, da sia decisiun da sistir la reorganisaziun haja el dentant era legì en las medias.

RR novitads 17:00