Siglir tar il cuntegn
Inhalt

Chantun Populaziun grischuna crescha vinavant

A la fin dal 2015 vivevan permanentamain 196'610 abitantas ed abitants en il chantun Grischun, 724 dapli che l'onn precedent. Sco durant ils onns precedents è l'augment d'attribuir surtut a la creschientscha da la populaziun estra.

Legenda:
Populaziun permanenta per ils 31-12-2016 en Grischun tenor regiuns Uffizi federal da statistica (STATPOP)

Cun in plus da 0,4% saja la rata da creschientscha però in zic pli bassa che quella dals onns avant, communitgescha l'Uffizi per economia dal Grischun.

Creschientscha en Grischun cunzunt per lung dad axas centralas

Las regiuns Plaun, Landquart e Moesa han contribuì l'onn 2015 procentualmain il pli ferm a l'augment da la populaziun en il Grischun. Cuntrari a quai abitavan la fin dal 2015 in pau pli paucas persunas en las regiuns Malögia, Bernina sco er Partenz/Tavau ch'in onn avant.

Augment mo tar la populaziun estra

Cuntrari a la populaziun svizra è la populaziun estra s'augmentada er l'onn 2015 relativamain ferm per 1,5%, da nov quinta il Grischun 35'921 abitantas ed abitants esters permanents.

La gruppa cleramain la pli gronda èn anc adina ils burgais portugais (9’542), suandadas dals abitants tudestgs (7’611) e da quels talians (6’320).

Tut en tut han persunas da 130 differentas naziuns lur domicil en il Grischun.

Er Cuira crescha levamain

La populaziun da la citad da Cuira è s'augmentada l'onn passà per 0,3%, la citad quinta da nov 34’652 abitantas ed abitants permanents.

Da las duas dunsainas da las vischnancas las pli grondas han survegnì procentualmain las pli bleras abitantas ed ils pli blers abitants Trimmis, Panaduz e Favugn. Entant han San Murezzan, Arosa e Claustra-Serneus subì las pli grondas perditas d'abitantas e d'abitants en questa gruppa.

Passa 700 persunas èn sa chasadas il 2015 en il chantun Grischun.
Legenda: Passa 700 persunas èn sa chasadas il 2015 en il chantun Grischun. churerfest.ch

Divergenzas tar ils svilups a lunga vista

La structura da la populaziun ed il svilup a pli lunga vista èn fitg differents tranter las regiuns grischunas.

Motors da creschientscha sajan stads ils ultims onns cunzunt las regiuns Plaun e Landquart cun augments da procentualas da duas cifras, scriva il chantun.

Per regla mussian regiuns cun ina dinamica pli pitschna u schizunt negativa er structuras da vegliadetgna demograficamain pli disfavuraivlas cun ina quota relativamain auta da persunas pli attempadas.

In zic damain naschientschas e dapli mortoris

L'onn passà èn naschids 1'748 uffants en il Grischun, 55 damain che l'onn precedent. Il dumber da las naschientschas ha surpassà pia mo levamain il dumber dals mortoris ch'è s'augmentà a medem temp sin 1’734. Stgars 80% da las mammas eran maridadas il mument da la naschientscha.

Plinavant èn vegnidas registradas l'onn passà 928 maridaglias e 6 partenadis registrads, 360 lètgs èn vegnidas divorziadas en il Grischun. Questas valurs èn stadas sumegliantas a la dimensiun sco en ils onns precedents.

RR novitads 10:00