Siglir tar il cuntegn
Inhalt

Chantun Populaziun grischuna crescha grazia als esters

La fin dal 2014 vivevan en il chantun Grischun permanentamain 195 866 persunas. Tenor la Chanzlia chantunala è quai 927 persunas u 0,5 % dapli cumpareglià cun l'onn 2013.

Legenda:
Populaziun permanenta per ils 31-12-2014 tenor regiuns Uffizi federal da statistica (STATPOP)

Entaifer il chantun è il svilup stà different: augments pli gronds hai dà cunzunt en las regiuns da Signuradi/Tschintg Vitgs (+1,8), Grischun dal Nord (+0,8%) ed en l’Engiadin'Ota (+0,9%). En l'Engiadina Bassa (-1,0%), Tavau (-0,7%) ed en la Surselva (-0,3%) è la populaziun dentant sa sminuida l’onn passà.

La citad da Cuira ha registrà l'onn2014 in augment da 0,6% e dumbrava il di da referenza da nov 34’547 abitants permanents. Da las vischnancas pli grondas cun passa 2’000 abitants è il dumber d’abitants creschì il pli fitg a Zizers, Domat ed a Landquart. Roveredo, Lumnezia ed Arosa han perencunter pers en questa gruppa ils pli blers abitants il 2014.

Augment mo tar la populaziun estra

Entant che la populaziun svizra en il Grischun stagnescha dapi onns sin il medem nivel (di da referenza 160’497 persunas), è la cumpart da las persunas estras che vivan permanentamain en il Grischun creschidas durant l'onn passà per 2,5% u per 870 persunas, da nov sin 35’389 persunas. Il pli fitg s’augmentà è la cumpact da la populaziun portugaisa e taliana: quai per 3,2 resp. schizunt per 3,9%. Il dumber d'abitants tudestgs n'è dentant strusch sa midà l’onn passà, sco durant ils ultims onns era.

La cumpart da las persunas estras che vivan permanent en il Grischun è uschia stada la fin dal 2014 tar 18,1%. En Svizra è la quota tar 24,3%. La gronda cumpart da persunas estras sa chattan en ils centers turistics Engiadina ed a Tavau, ma er la Mesolcina sco er il Grischun dal nord demussan parts surproporziunalas. Quotas da persunas estras pli pitschnas sa chattan en las regiuns plitost ruralas.

Be dus chantuns han anc pli pauc

En cumparegliaziun cun l'augment da la populaziun permanenta en Svizra (1,2%) è la midada en il Grischun stada modesta. Mo ils dus chantuns Appenzell Dadens e Sutsilvania nodan per l'onn 2014 in pli pitschen augment da la populaziun ch’il Grischun.