Il chantun Grischun ha laschà avert las terrassas da las ustarias en ils territoris da skis - er sur fin d'emna. E quai malgrà ch'il Cussegl federal ha decidì l'emna passada ch'ils chantuns na dastgan betg pli lubir talas excepziuns davent da la fin d'emna. Tenor Marcus Caduff, il cusseglier guvernativ responsabel, duain las terrassas er vinavant restar avertas. Cun suandanta argumentaziun:
Nus avain interpretà quai ch'è vegnì publitgà uschia, ch'igl è ord vista epidemiologica la meglra varianta da dar la pussaivladad da seser.
In zic auter interpretescha l'Uffizi federal da sanadad, il BAG, las ordras dal Cussegl federal.
Tenor nossa valitaziun na dastgan naginas plazzas vegnir drizzadas en e messas a disposiziun per la consumaziun.
Va il chantun Grischun uss pia sin curs da confruntaziun cun la Confederaziun? Tenor Marcus Caduff na:
Nus guardain tge che fa il pli bler senn ord vista epidemiologica, da betg avair gruppas nuncontrolladas che stattan enturn ix-enzanua, ed en quai connex è quai la meglra schliaziun.
Er giaja quai per ina tscherta egualitad tranter las ustarias en vitgs e citads, nua che la glieud haja er la pussaivladad da seser insanua sin bancs en il spazi public. Per quels motivs na midia er l'avis dal BAG actualmain nagut vid la posiziun dal chantun.
