Siglir tar il cuntegn
cuntegn

Chantun Polizia grischuna impedescha transport da chavals

Il pur da Hefenhofen che stat en la critica d'avair maltractà animals, aveva era chavals sin in'alp sper Tavau. La Polizia chantunala grischuna ha impedì il venderdi passà il transport d'ina Alp en la Val Dischma a Tavau.

Ils chavals sin la puraria a Hefenhofen.
Legenda: Ils chavals sin la puraria a Hefenhofen. Keystone

Persunas ord ses ambient social han il venderdi empruvà dad ir per quels, quai ha confermà la pledadra da la Polizia chantunala, Anita Senti, envers l'agentura da novitads sda. Perquai ch'il temp dad alp saja uss a fin, vegnia tschertgà nagin nov plaz per ils chavals.

Critica envers las autoritads

Il maltractader d'animals dal chantun Turgovia dat da discutar dapi l'entschatta d'avust. Era envers las autoritads dal chantun Turgovia datti pervi da quai cas critica. Sin la puraria dal possessur d'animals eran plirs chavals crappads. Auters animals eran smagrids u en in mal stadi.

En il Cussegl grond dal chantun Turgovia hai dà diversas intervenziuns pervi da la puraria a Hefenhofen. La regenza dal chantun ha nominà ina cumissiun independenta sut la direcziun da l'anteriur cusseglier guvernativ dal chantun Zug, Hanspeter Uster. Quella cumissiun duai intercurir il cas.

RR novitads 14:00