Siglir tar il cuntegn
cuntegn

Chantun Polizia chantunala – prevenziun da criminalitad en las scolas

Polizia en scola. Quai è nagut nov. La Polizia chantunala fa gia daditg lavur preventiva en las scolas. Nov è ch’igl na sa tracta betg da lavur preventiva en vista al traffic, mabain da criminalitad da giuvenils.

Graffiti en ina chasa da scola
Legenda: Cun vandalissem ha la Polizia chantunala savens da far. Cun lavur preventiva vul ella dar in cuntrapais. Keystone

L’onn 2010 ha la Polizia chantunala stgaffì il post da servetsch da giuvenils. Finamira da quest post è l’elavuraziun da cas criminals da giuvenils. Sper la lavur repressiva han ins dacurt era cumenzà cun lavur preventiva. Pia, visitas en scolas e far attent ils scolars. La Polizia chantunala discurra davart ils cas che fatschentan ella il pli savens en connex cun giuvenils. Sper vandalissem ed armas illegalas è quai era mobing. E quai è il focus principal tar las visitas en scolas. Far attent ils scolars nua ch’els pon ir per agid sch’els èn pertutgads da mobing, sco era far attents tge che schabegia sch’els sezs fan mobing.

Tar las scolas in med popular

Il resun da la lavur da prevenziun en las scolas è positiv tenor Marcus Corai da la Polizia chantunala. En cooperaziun cun la lavur sociala da las scolas retschaivia la Polizia chantunala bleras dumondas per ina visita en la scola.

Uschia era a Schluein, nua che Marcus Corai ha referì avant la 5avla e la 6avla classa da la scola primara. Durant radund in’ura ha il policist discurrì cun ils scolars, dà in pitschen excurs en il dretg penal e dà scleriments davart mobing en l’internet.

Criminalitad - statistica da l'onn 2016 (ord l'archiv)

Legenda: Guardar il video Mintgadi prest 23 delicts en il Grischun. Durada 02:44 minutas.
Or da Telesguard dals 27.03.2017.

RR actualitad 11:00