Siglir tar il cuntegn
Inhalt

Chantun Polizia avertescha da cugliunarias sur l'internet

Pliras persunas en Grischun èn daventadas las unfrendas da cugliunarias sur l'internet. Ils pertutgads han per part pajà plirs millis francs sin contos da l'exteriur. La prontadad da gidar da quellas persunas è vegnida nizzegiada ora.

Purtret d'ina bursa e cartas da credit avant la tastatura da computer.
Legenda: Ils cugliunaders han piglià si contact sur e-mail u facebook. Keystone

Cun els è vegnì communitgà sur apps, e-mail u facebook. Suenter esser vegnì contactà suonda per ordinari in dialog ed i vegn empruvà da stgaffir ina relaziun da confidenza. En il decurs dal dialog vegn descrit ina situaziun finanziala precara. Silsuenter pajan ils donnegiads daners sin contos en l'exteriur. Ina dunna è vegnida cugliunada per 90'000 francs, quai cun dir ch'ils daners vegnian duvrads per in'operaziun.

La polizia chantunala avertescha da restar attent e cusseglia ils suandants puncts en cas da malsegirezza:

  • Esser sceptics tar da questas emprovas da pigliar si contact.
  • Dumandar tge ch'ins survegnia en return per ils daners. Sch'i na dat nagut en return per ils daners èsi fitg probabel ch'i sa tracta d'ina cugliunaria.
  • Tematisar quest contact cun parents.
  • Annunziar a la polizia sch'ins è daventà unfrenda d'ina tala cugliunaria u emprova d'ina cugliunaria.

RR novitads 09:00