Siglir tar il cuntegn
Inhalt

Chantun Politica GR davart Parmelin: Anc mitschà cun in egl blau

Betg propi bun per il Grischun - il meglier da 3 candidats nauschs - finalmain ha la PPS 2 sez en il Cussegl federal. Quai èn intginas da las reacziuns da la politica e populaziun grischuna sin l'elecziun da Guy Parmelin. Ins saja vegnì davent cun in egl blau...

Guy Parmelin.
Legenda: Guy Parmelin n`è anc betg fitg enconuschent en il Grischun. Keystone

Uss saja la Partida populara svizra clamada a dapli responsabladad. Quai è in dals mainis da deputadas e deputads en il parlament Grischun. Sin las vias grischunas èn ins per tutta regla cuntent cun l'elecziun, era sche Parmelin n'è anc betg propi enconuschent.

«Jau n'enconusch betg a quest Parmelin»

Ils ins san, ch'el è pur da vin, ils auters ch'el deriva da la Svizra franzosa. Dapli san paucs. Che la Partida populara svizra è uss represchentada cun dus sez en il Cussegl federal vegn da principi beneventà.

Tar la politica vegn deplorà ch’i n’è betg grategià da survegnir in represchentant da la Svizra orientala en il Cussegl federal. Malgrà da quai èn ins levgià. Gist che Thomas Aeschi n’è betg vegnì elegì saja d’avantatg per il Grischun.

Egl blau

Cun Guy Parmelin sajan ins mitschà cun in egl blau, ha confermà il cusseglier guvernativ Mario Cavigelli.

La dumonda che sa tschenta a bleras deputadas e blers deputads è però gia: Cura vegn puspè in represchentant da la Svizra orientala en il Cussegl federal? U schizunt: cura basta quai puspè per in Grischun? Endament vegn qua betg a paucs ils 2 cussegliers dal chantun Grischun Martin Schmid (PLD) e Stefan Engler (PLD).