Siglir tar il cuntegn

Header

Navigaziun

En la scola da polizia emprendan ils aspirants tut quai ch’i dovra per il mintgadi.
Legenda: En la scola da polizia emprendan ils aspirants tut quai ch’i dovra per il mintgadi. Keystone
cuntegn

Chantun Policists èn dumandads

La tema d’attatgas da terror, la criminalitad en l’internet ni er la crisa da fugitivs. Quai èn divers motivs daco che blers corps da polizia en l’entira Svizra auzan pli e pli il dumber da persunal. Chattar policists è dentant grev, perquai ch'ils blers ston gl'emprim anc vegnir scolads.

La polizia chantunala grischuna dumbra actualmain bun 400 policists.
Legenda: La polizia chantunala grischuna dumbra actualmain bun 400 policists. MAD

Tenor la federaziun da polizia Svizra datti memia paucs policists. Els discurran da plirs millis policists che mancan. Er tar la polizia chantunala dal Grischun è il dumber da policists plitost stgars. Remo Cavegn, president da la federaziun da policists chantunals grischuns beneventass fitg sch’il dumber da persunal vegniss auzà ils proxims onns. «Il basegn da segirezza è creschi ils davos onns tar la populaziun». Tranter auter haja quai er da far cun la tema d’attatgas da terror. Plinavant vegni era la criminalitad en l’internet a crescher vinavant, l’uschenumnada «cybercriminalitad».

Il cusseglier guvernativ e directur da polizia, Christian Rathgeb conceda che la polizia chantunala grischuna n'haja propi betg memia bler persunal. Grazia ad ina grond’effizienza tanschan ils bun 400 policists dentant per ademplir tut las lavurs. Ma cler, sche Rathgeb astgass giavischar, giavischass era el dapli policists. Spezialmain eveniments gronds sco il WEF a Tavau u ils Campiunadis da skis a San Murezzan pretendian fitg bler dals las policistas e dals policists.

La polizia da la citad da Cuira auza il dumber d'emploiads

La citad da Cuira auza il dumber da policists ils proxims onns da 78 sin 84. Chattar policists ch’èn gia scolads n’è dentant betg simpel, declera Ueli Caluori, cumandant da la polizia da Cuira. Cunquai che blers corps en l’entira Svizra auzan il persunal saja il martgà da lavur sitgs. Perquai vegni tschertgà giuvens ch’èn pronts da far la scolaziun da policist. «L'interess è propi grond tar la giuventetgna», declera Caluori. Els n’hajan betg in problem da chattar giuvens interessads.

Ueli Caluori, il cumandant da la polizia da la citad da Cuira.
Legenda: Ueli Caluori, il cumandant da la polizia da la citad da Cuira. RTR

Visitar la scola ad Amriswil (TG) per daventar policist

Tar la citad da Cuira vegnan inoltradas mintg’onn bun 40 fin 50 annunzias da persunas che vulessan visitar la scola da polizia da la Svizra Orientala. La fin finala hajan dentant mo quatter fin set da quels aspirants la pussaivladad da far questa scola, declera Roland Hemmi, policist tar la polizia da Cuira e scolast a la scola da polizia. La scola saja pretensiusa e definitiv betg insatge per mintgin. Ella cuzza in onn ed ils absolvents vegnan confruntads cun bler nov. Cun scolaziun en teoria e pratica vegnan els preparads sin la lavur quotidiana. E Roland Hemmi cumplettescha: «Mo il siemi da daventar policist na tanscha betg. I dovra bler engaschi.»

I dovra bler engaschi per absolver la scola da polizia
Autur: Roland Hemmipolicist e scolast a la scola da polizia ad Amriswil

RR actualitad 11:00