La proxima midada da l'urari porta al Grischun meglieraziuns en la purschida dal traffic public. Da nov circuleschan colliaziuns dal ICE tranter Cuira e Francfurt/Main e Hamburg. Cun trens attractivs d'auta sveltezza vegn garantida ina colliaziun pli svelta e pli confortabla tranter il Grischun e la Germania.
Colliaziuns supplementaras la fin d'emna
Las notgs dal venderdi sin la sonda e da la sonda sin la dumengia cursescha da nov ina colliaziun da tard accelerada da la staziun principala Turitg a Cuira, cun fermadas a Thalwil, Wädenswil, Sargans, Ragaz Bogn, Maiavilla e Landquart.
En direcziun da Laax vegnan medemamain purschidas la fin d'emna colliaziuns da tard a las 00.50 ed a las 02.15 davent da la staziun d'autos da posta Cuira. L'ultim curs per Laax cuntinuescha en cas da basegn ses viadi fin a Glion.
Per ademplir il basegn pli e pli grond da la clientella d'avair meglras colliaziuns da tact vegn a medem temp condensà ed optimà l'urari en Val Müstair, en Tumleastga ed en il Signuradi.
RR novitads 10:00