- En Grischun èn il 2017 vegnids registrads damain delicts che l'onn avant.
- Ils cas grevs da violenza han tuts pudì vegnir sclerids.
- Creschì è il dumber da baruffas e violenza/smanatscha cunter funcziunaris.
- Il dumber da delicts è sa reducì dapi ils ultims quatter onns en l'entira Svizra.
En il chantun Grischun èn vegnids registrads l'onn passà 8541 delicts. Quai èn 379 damain che l'onn 2016. La part la pli gronda èn acts chastiabels cunter il Cudesch penal svizzer, numnadamain 6287 (onn precedent 6870). Per cumparegliar: L'onn 2009 eran anc vegnids registrads 8156 acts chastiabels cunter il Cudesch penal svizzer. La distgargia ch'è vegnida constatada dapi lura pertutga oravant tut la regiun da Cuira, l'Engiadina ed il Mesauc.
Delicts suenter leschas e quota da scleriment
| Acts chastiabels cunter | Dumber da delicts 2016 | Quota da scleriment 2016 | Dumber da delicts 2017 | Quota da scleriment 2017 | Differenza da delicts cumpareglià cun il 2016 |
|---|---|---|---|---|---|
| Cudesch penal svizzer | 6'870 | 41,1% | 6'287 | 40,7% | -8% |
| Lescha davart ils meds narcotics | 1'334 | 99,5% | 1'495 | 99,8% | +12% |
| Legislaziun davart las persunas estras | 175 | 99,4% | 165 | 100,0% | -6% |
| Ulteriuras leschas federalas | 541 | 93,2% | 594 | 94,8% | +10% |
Tar ils delicts da violenza grevs è vegnì registrà in augment da 6 cas envers l'onn precedent (da 36 sin 42). Quai èn dus mazzaments, 27 blessuras corporalas grevas e 13 violaziuns. Els èn vegnids sclerids 100 %. E da tut ils delicts da violenza èn vegnids sclerids 92 % (onn precedent 91 %).
Augment da baruffas e da violenza
La gronda part dals delicts da violenza èn blessuras corporalas levas, acts violents, baruffas, constricziuns, smanatschas e violenza/smanatscha cunter funcziunaris. Tar las baruffas po vegnir registrà in augment da 27 sin 48 cas, tar ils cas da violenza/smanatscha cunter funcziunaris in augment da 24 sin 41 cas. En il rom da relaziuns sumegliantas ad ina famiglia èn vegnids commess 238 delicts da violenza, 57,5 % (onn precedent 40,5 %) da quels pertutgan relaziuns actualas da pèrs resp. da partenaris.
Enguladitsch sco indicatur
L'enguladitsch sco delict da massa stat sco indicatur per in grad da criminalitad d'intensitad leva. L'onn passà èn vegnids registrads 1861 enguladitschs (-9 % cumpareglià cun il 2016) – 415 da quels èn stads enguladitschs cun infracziun. L'onn 2009, il cumenzament da la statistica criminala da la polizia, eran anc vegnids dumbrads 2995 enguladitschs (592 da quels enguladitschs cun infracziun).
Umens tranter 15 e 35 onns dattan savens en egl
La quota da scleriment en quest sectur importa buns 23,8 % (onn precedent 24,0 %). Da tut ils acts chastiabels cunter il Cudesch penal svizzer ha la polizia chantunala dal Grischun sclerì 40,7 % (onn precedent 41,1 %). Tar ils delicts cunter il corp e cunter la vita sa chatta la quota da scleriment tar 92,5 % (onn precedent 94,2 %). Tranter las persunas inculpadas en il sectur dal Cudesch penal svizzer dattan ils umens tranter 15 e 35 onns spezialmain savens en egl a la polizia.
Er en Svizra damain delicts criminals
L'onn passà hai danovamain dà pli paucs delicts criminals en Svizra. En general sa reducescha il dumber da delicts dapi il 2012, quai communitgescha l'uffizi federal da statistica. L'onn passà hai dà en total 440'000 delicts penals. Aifer ils ultims 5 onns è il dumber total da delicts sa reducì per passa 170'000. 4 da 5 delinquents abiteschan en Svizra. Per l'emprima giada èn vegnids registrads il 2017 er ils cas da violenza/smanatscha cunter emploiads da la polizia. L'onn passà hai dà passa 3'000 cas, quai munta en media 8 a di.
RR novitads 12:00