La retschertga da la SRG SSR mussa in plus da 1.3 puncts procentual per la PLD sin plaun naziunal. Per la PLD grischuna forsa ina buna chaschun da nizzegiar il schlantsch per las elecziuns dal Cussegl naziunal da proxim onn. Co la strategia dals liberaldemocrats vesa ora e tge politichers che pudessan ir en la cursa n'ha il president da la PLD grischuna Bruno Claus betg pudì dir. I saja anc memia baud da discurrer da pussaivels candidats.
Tgi prenda plaz sin il carussel da candidatas e candidats?
Candidats pussaivels da la PLD èn la deputada Vera Stiffler ed il deputà Michael Pfäffli. Per omadus èsi anc memia baud da dir sch'els stettian a disposiziun u betg. Ma exclus ina candidatura n'han omadus betg.
Auter vesa quai or tar il president da la citad da Cuira Urs Marti. El na stettia definitivamain betg a disposiziun sco candidat per il Cussegl naziunal. El haja plaschair vid sia lavur per la citad da Cuira e less vinavant restar en questa funcziun. Er pauc interess dad ir giu Berna mussa Tarzisius Caviezel, il landamma da Tavau. El è gia stà ina legislatura en la chombra gronda (2007-2011). Ch'el turnia anc ina giada giu Berna na crai el betg. T
ar quels che na vulan betg s'auda er cusseglier guvernativ Christian Rathgeb. El aveva gia avant las elecziuns da regenza detg ch'el haja nagin interess d'in mandat en il Cussegl naziunal.
RR actualitad 12:00
