Siglir tar il cuntegn

Header

Navigaziun

Cusseglier guvernativ Christian Rathgeb
Legenda: Christian Rathgeb e ses departament examineschan bajetgs pussaivels per crear novs centers da transit. RTR
cuntegn

Chantun «Plaunet mancan ils plazs»

La fin d'avust eran 1'200 persunas en il Grischun en il process d'asil. 631 da questas valan sco persunas recepidas provisoricamein ed i vegn vinavant glieud en Svizra. Plaunet vegni stretg en ils centers, sincerescha il cusseglier guvernativ e schef dal Departement da giustia, Christian Rathgeb.

Il Grischun ha da surprender dalla Confederaziun 2,7% da tut quellas persunas che damondan asil. I haja sulet anc intgins paucs plazs libers en ils centers di Rathgeb. Cunquai ch'il center da reserva Schiebach a Tavau na stat davent la primavair er betg pli a disposiziun tschertgia il chantun ulteriurs bajetgs.

Anteriuras chasas da scola n'èn betg sclaussas

Il bajetg ch'era quintà sco center da reserva a Litzirüti sto gia vegnir avert l'entschatta dal 2016. Uschia manca al chantun vinavant in center da reserva e l'Uffizi da migraziun è il mument vidlonder d'examinar ils bajetgs ed objects che vischnancas e persunas privatas han fatg amogan. Anteriuras chasas da scola, sco per exempel quella da Rueras nua ch'i vegn ponderà da metter a disposiziun il bajetg, na sajan betg a priori sclauss, ha ditg Rathgeb. In object haja d'ademplir lur pretensiuns d'infrastructura e betg esser memia lunsch davent dals centers.

Cunquai che l'uffizi è vidlonder d'examinar na vul il minister da giustia grischun betg tradir nua ch'ils bajetgs purschì sa chattan. Cler è dentant ch'i dovra almain in nov bajetg sco center da reserva.