Siglir tar il cuntegn

Header

Navigaziun

La presidenta da l’Uniun da magistraglia grischuna Sandra Locher declera co ch'ella less cumbatter per pajas pli autas per mussadras da scoletta.
Legenda: La presidenta da l’uniun da magistraglia Sandra Locher declera co ch'ella less cumbatter per pajas pli autas. RTR, Selina Chistell
cuntegn

Chantun Plant per pajas gistas per mussadras da scoletta

L'Uniun da la magistraglia grischuna (LEGR) porta plant avant Dretgira administrativa encunter trais enfin tschintg vischnancas che pajan pajas bassas a lur persunas d'instrucziun da scoletta.

Quai han la radunanza da delegads sco era la radunanza da fracziun per scoletta decidì.

Tenor la presidenta da l'Uniun da magistraglia grischuna survegnian mussadras da scoletta en diversas vischnancas en il Grischun ina paja memia bassa en cumparegliaziun cun professiuns cun ina sumeglianta scolaziun e vegnian uschia discriminadas.

Finamira d’auzar pajas minimalas

Prendì il cas che l’uniun da magistraglia survegn raschun avant Dretgira administrativa duaja questa decisiun esser in segn a la politica. L’uniun less lura numnadamain duvrar quella per per exempel cuntanscher ina revisiun parziala da la lescha da scola ed uschia procurar che las pajas minimalas per persunal d’instrucziun da scoletta, ch’èn il mument tar pli pauc che 5’000 francs per mais, creschan.

Proxims pass

Ils proxims pass per Sandra Locher, presidenta da l’Uniun da la magistraglia grischuna, èn da decider tar tge vischnancas ch’i dat in plant da l’uniun e tar tgeninas in plant singul da las mussadras pertutgadas. Silsuenter vegn il plogn elavurà e tenor Sandra Locher quinta l’uniun da magistraglia da savair inoltrar quel la proxima primavaira a la Dretgira administrativa.

RR novitads 17:00