Siglir tar il cuntegn
cuntegn

Chantun Planisar ina tura e studegiar la prognosa da l’aura

Persunas che van a viandar duessan sa preparar per la tura. Nadia Deplazes da Surrein, ella è sa scolada sco guid da viandar e dat intgins tips en connex cun l’aura.

Fotografia d'in urizi.
Legenda: In viandant sto savair co reagir durant in urizi. ANR

Ins po vegnir en in urizi

Ina tura duess ins planisar bain, surtut ils dis ch’ì ha nivels. Ins sto ponderar, tge tura che saja adattada en mintga situaziun, di Nadia Deplazes. Impurtant èsi ch’ins possia s’orientar ed in avantatg saja sch’ins po leger ina carta. Ins sto era ponderar, sch'i dat variantas ubain pussaivladads da scursanir ina tura, surtut sche l’aura sa mida. Quai po capitar spert en las muntognas. La damaun èsi anc bell’aura, e tuttenina vegn ins en in urizi. Surtut sch’i entschaiva a tunar e chamegiar, èsi d'observar intginas reglas:

  • mai star ensemen en ina gruppa
  • na betg ir sut ina planta (plitost tschertgar refugi en in guaud) ubain sin crests
  • evitar auas e saivs electricas
  • sch’ins na po betg ir enavant, èsi bun da star a granugl e tegnair ensemen las chommas

Sendas pon esser glischnas

E sch’i ha pluvì na duess ins betg emblidar ch’ina senda po esser bletscha e glischna. Sco Nadia Deplazes di ston ins era ponderar, tge che quai munta sch’ins ha in accident e la Rega na po betg vegnir, il telefon disdescha ubain ch’i fa fraid ed i cuzza in mument fin che la colonna d’agid è sin il plaz. Sa chapescha ch’ins duess prender ina giacca ubain in pullover en il satgados.

Resumà: Mintgin duess adattar la tura a l’aura ed a l’atgna experientscha. E sch’ins ha dubis, èsi meglier da turnar a chasa.