Dapi quest mais vala en il Grischun il plan d'instrucziun 21. Tut ils 2'650 magistras e magisters grischuns vegnan perquai scolads successiv per il nov plan. Els tuts visitan en ils proxims mais ed onns curs da scolaziun. L'onn 2021 duessan tuts esser fits per il nov plan. Il plan d'instrucziun 21 vala per la scolina, la scola primara ed il stgalim secundar 1 e 2. Il stgalim 3 segua in onn pli tard.
Nov plan d'instrucziun – novs meds d'instrucziun
Josy Künzler è la responsabla per ils meds d’instrucziun dal chantun. Tenor ella èn en las regiuns tudestgas dal chantun quasi tut ils meds d’instrucziun avant maun. Ma per las regiuns rumantschas e talianas manchian quels per gronda part. Ma quai na saja betg nov, era fin qua n’hajan las regiuns rumantschas e talianas betg giu tut ils meds d’instrucziun. Dus facturs sajan qua decisivs. Per l’ina las finanzas, per l’autra chattar persunas la traducziun, ha ditg Künzler.
Il nov plan cuntegna tranter auter novs roms: Sin il stgalim secundar ils roms «orientaziun professiunala» e sin stgalim primar «etica, religiun e cuminanza». E sin tuts dus stgalims il rom «medias ed informatica».
RR actualitad 07:00