Siglir tar il cuntegn
cuntegn

Chantun «Placats in zichel sco paninis»

Dapertut pendan placats d'elecziun. In vul esser pli simpatic che l'auter. Dentant insatge è cler: «I na va betg per l'elecziun da Miss u Mister Svizra», di Curdin Janett, expert ed agent da reclama. El sa, co placats ston vesair ora per gudagnar electuras ed electurs.

Curdin Janett, agent da reclama.
Legenda: Curdin Janett sa fatschenta cun la reclama en connex cun las elecziuns naziunalas. RTR, S. Bundi

Curdin Janett è agent da reclama da l’onn 2015. Quest premi ha el gudagnà tranter auter cun far transfurmar Orange en Salt. Curdin Janett ha prendì sut la marella ils placats da candidats grischuns per il Cussegl naziunal. E l'emprima impressiun da Janett è che nagins dals placats dattan propi en egl. Ils placats èn sulettamain bels purtrets, «in zichel sco paninis».

In purtret è memia pauc

In surrir simpatic ed ina cravatta bella na tanschian dentant betg cur ch'i va per politica, di Janett. Il pli impurtant saja da mussar l’istorgia dal candidat, da dar a l'electur u a l'electura in argument pertge ch'ins haja da eleger questa persuna. «Ins na elegia betg vestgadira, ins elegia persunas».

I dovra in messadi cler

Dapli da quests arguments sco Janett giavischa, èn da chattar sin ils placats da las glistas. Pia sin quels placats, nua che tut ils 5 candidats da la glista vegnan preschentads. La PCD per exempel ha il slogan «Nus s'engaschain per il Grischun». A Janett manca dentant igl impurtant, per tge exact che la PCD vul propi s'engaschar. I dovria in argument pli cler.

Curt e cler fiss l'ideal

Er ils proxims placats che Janett valitescha han tuts il medem problem. Els han slogans fitg curts da 2 pleds. Dentant èn quai pleds «che na dian betg exact tge ch’ils candidats vulan». Uschia ha per exempel la PS sco slogan «Fortschrittliches Berggebiet», la PBD ha il slogan «Konsequent lösungsorientiert» e la PPS «Frei bleiben». Janett di: «Sch'ins prenda gia in slogan cun be 2 pleds, sto ins prender 2 che tuts chapeschan.»

Fotografia e text sa cuntradin

In slogan da 3 pleds han ils Verd-liberals, «Nus essan energia» dian ils candidats sin lur placat. Sche Janett mira dentant sin las persunas, sche fiss quai slogan plitost adattà per candidats in zichel pli giuvens. La fotografia na va per Janett pia betg propi a prà cun il text. Er betg tar il placat da la PLD. Lezza ha sco slogan «Per plazzas da lavur en il Grischun». Sin il placat stattan ils candidats e las candidatas ensemen in zichel sco da far in selfie. L'idea da far uschia ina fotografia plascha bain a Janett, dentant «vul la PLD esser ina partida seriusa che stat bun per dapli plazzas da lavur en il Grischun, ed jau na sai betg sche quai va bain ensemen cun in selfie.»

I mancan las surpraisas

Il facit da Janett è pia sumegliant sco si'emprima impressiun, nagin placat dat en egl, in zichel sco paninis.